السلام عليكم صبايا
كيفكم وش اخباركم
بما انه خلاص رجعت من السفر و فضيت خلاص
و هذا اول سبت اجازة يعني اول سبت يكون ويك اند
راح افضى للمدونة و افضى اني اكتب بوستات اكثر
المهم اليوم بعد ماخلصت شغلي خرجت انا و زوجي عشان نتعشى برا
و كان جاي مزاج زوجي على الاكل المصري
بينما انا حدي في المصري اكل كشري ههههههه غيره لا .. مستحيل اكل او حتى اجرب
فأشترطت على زوجي نروح مطعم مصري يكون تظيييف مو اي مطعم
و بعد اللف و الدوران وقع اختيارنا على
مطعم رمسيس
هو ابو شقرا سابقاً
بس غير الادارة و الديكور و اعتقد كمان الشيف
اول ما وصلنا المطعم كان فل و الساعه كانت
ومع كذه كان المطعم زحمة
و سوء تنظيم منهم او من كثر الزحمة كان الواحد يجلس قريب الطاولة اللي فاضيه لغاية ما تتنظف و يحجزها
المطعم كان كل شيء فيها يدل على انه مطعم مصري صح من ديكورات و شغل الخشب فيه
حتى ورق الجدران فيه كان مرسوم عليها اهرامات
دخلت دورة المياه اللي كانت الوان الرخام فيها يتماشى مع الوان الديكور في المطعم
بعد ما خرجت من دورة المياه الله يكرمكم لقيت زوجي حجز طاولة اخيرا
هذا باب الجلسة
مثل ما قلت لكم كل شيء يدل على انه مطعم مصري
هذه يد بنتي جنوي ههههه مو راضيه تشيل يدها
و هذه اطلالة الطاولة حقتنا
مو باين من الرطوبة طبعا الرطوبة في جدة شيء ثاني
بعد كذه اخذت المنيو
اللي كان كمان اول صفحة منه فيها صور للمتحف المصري في مصر
و بعد عشر دقايق وصل طلبنا كلها كامل ما عدا وجبة جنى ما جابوها
كنت افضل يقدموا اول شيء المقبلات و بعدين الطبق الرئيسي
طبعا مثل ما انتم شايفين
طلبنا هو
سلطة يونانية / شوربة كوارع لزوجي ما اقولكم مزاجه اكل مصري / حمام محشي / و اسكندرنية اللي هو سي فود طلبي
و اخيرا وصل اكل الغالية جنوي طفشتنا لغاية ما وصل اكلها
في المنيو كان فيه 3 وجبات للأطفال
اسمائها ليون كينج / سبونج بوب / نسيت وش اسمها
اللي طلبناها ليون كينج و هي كفته مع بطاطس او ارز اختياري
و لما جاء وقت الحلى جاء وقت نوم جنى فأضطرينا نلغي الحلى
و نحاسب و نخرج
و لما جينا نحاسب اعطوا بنتي لعبة و فرحت مرة كأنها اول مرة تأخذ هدية
مع انها كانت لعبة يمكن رخيصه لكن مجرد انهم افتكروا يوزعوا هدايا على الاطفال اشوف انها فكرة ذكية
الان جاء وقت التقييم
الديكور اعطيه10/10
كان الديكور حلو و متناسق و لكن فيه شيء واحد ابدا ما عجبني بين الطاولات فيه زجاج المفروض يكون عاكس في الاول ما انتبهت
لكن بنتي قالت لي يا ماما شوفي الناس جنبنا
اللي كانوا في الطاولة اللي جنبنا ما انتبهوا و البنت كانت متنقبه كشفت و فتحت الطرحة مسكينه ما كانت تدري لغاية ما قلت لها
الخدمة 10 / 8
يمكن من كثر الزحمة مدري
ابدا ما شفت تنظيم
غير الطلبات جابوها مرة واحدة لغاية ما خلصت السلطة كان باقي الاكل برد
الاكل 10 /10
صراحة هذا اكثر شيء حببني في المطعم و يمكن ارجع له مرة ثانية هو الاكل و حتى طريقة التقديم مرة عجبتني
و حتى الشوربة كانت مرة لذيذة الاكل كلها الطعم كان واو
النظافة 7/10
في كل مكان في المطعم كان نظيف ما عدا
هذه الصورة قبل العشا كانت دورات المياه كلها مناديل
لان نحن ما شاء الله نظيف و نحب النظافة
لكن بعد العشا دخلت لقيت المكان
نظيف فأنا ما ادري يعني كان بس وقتها او كيف ؟؟
السؤال هل راح ازور المطعم مرة ثانية ..؟؟؟
ان شاء الله
بس افضل بعد الاجازة تكون ساعتها خفت الزحمة
و
سلامتكم
هذا تقريري اليوم حبيت اشاركم عشائي و افيد اللي حابه تروح هذا المطعم او تدور عن مطعم يقدم اكل مصري في جدة
و هذه صفحتهم في الفيس بوك
و اخيرا
اتمنى انكم تتابعوني على تويتر و الانستجرام
JANOON
ليست هناك تعليقات:
إرسال تعليق